掃呢頁CODE去手機

2015年7月16日 星期四

大陸生意損手  45歲張慧儀:放得低先有出路! [壹週刊 - 1323] 張慧儀,M1,



八年後再嚟性感嘅張慧儀,依然一副戰鬥格。

探熱針

大陸生意損手  45歲張慧儀:放得低先有出路!

為照顧患有先天性心臟病的養子,張慧儀收起胸器,棄幕前轉行從商。事隔八年,養子已經 12歲, 45歲張慧儀再戰性感, 34C震撼,充滿戰意。

風浪造就強頑,在商場打滾多時的張慧儀經歷上落,一手建立的廣西蔘茸禮品店生意,去年因為內地打貪大受打擊,她咬緊牙關再捱過。「放得低先有出路!」張慧儀說。

為「詩琳」冧庄任代言,張慧儀的 34C「胸湧」得嚟好自然。

身家冇咗大半

曾被歸類為性感尤物的張慧儀,從商後八年來收埋的 34C,終於重出江湖。

冧庄再為美容院「詩琳」做代言,張慧儀出動珍藏已久的逼爆 C胸,加上防腐外殼,絕不下於市面其他倒奶𡃁模。

「四十五歲都有四十五歲嘅靚,將好嘢騷出嚟俾人欣賞吓。」張慧儀說。

從商八年,經歷不少起跌,亦令張慧儀培養出一股頑強戰鬥力。花了三年時間心血,在廣西開設蔘茸禮品店,生意上軌道後,前年張慧儀帶同養子 Hanson回流香港拍劇,遙控業務。其實當時禮品店生意已擴展到有人敲門想做特許經營,豈料與一眾加盟商傾到七七八八時,去年內地施行收緊政策,令張慧儀的心血付諸流水。

「對我嚟講係有唔開心,嗰一剎那,覺得放咗咁多時間心機,由批發做到禮品門市唔容易,但一個大環境改變,幾乎將我建立嘅嘢完全推倒,就算未去到零,都唔見咗好多。我有失落,心情差到唔想講嘢;但我知道要快啲調節,唔可以沉溺喺呢種情緒入面,我係個意志好頑強嘅人。」一殼眼淚,張慧儀都頂硬上。

雖然已屆中女,但張慧儀影性感相仍揮灑自如,表現自信。

去年與另一代言葉蘊儀、徐子珊出席開幕禮,當時的她都未敢豁出去。

去年經歷生意失利,受打擊的她好快爬起身,繼續撐住盤心血。

養子 Hanson,一直是張慧儀硬淨抗逆的原動力。

去髮型屋搲客

一個女人,要獨自照顧有先天心臟病的養子,根本不容許張慧儀浪費時間。

「擴展唔到,咪即刻縮減裁員囉!開始公司有八個員工,之後去到十幾人;依家縮到五個,至於身家少咗幾多具體就唔講。」張慧儀說。

由北到南,張慧儀經歷不少起跌。○八年在北京搞果醬生意失敗後,同年她帶着一堆健康產品,與養子搬到廣州重新開始。冇人冇物,為了生活,她可以摸上髮型屋𢱑客,面子不是成本。

「開拓市場好講毅力,嗰時我先發現自己係咁捱得!面對一個陌生環境(廣州),冇朋友冇客戶,我走去洗頭地方(髮型屋)同時裝店,睇吓邊個係老闆或者經理,行埋去自我介紹。」

去年張慧儀在深水埗擺檔賣家鄉食品,為養活 Hanson,她甘願放低藝人身段親自 sell客。

多年冇拍劇的張慧儀,在去年出街的《 M Club》,狀態同表現都被網民讚。

出道時走性感的張慧儀,一套戰衣殺死唔少男士,再回味亦索過依家一眾𡃁模。

做好身教

「有咩嘢係擺唔低?都冇辦法,只有你想定唔想做。你過唔到就學唔到嘢,呢啲咪挑戰囉!成日諗住好難受,就突破唔到。幾難聽嘅說話都聽過,最深刻一句:『你係明星嚟喎,做埋啲咁嘅嘢呀!』當時我賣健康產品,要親身做測試,聽到當堂鼻子一酸;不過我即刻提醒自己,以後無論點,都唔會咁樣同人講嘢,太 hurt人。

「總之我心態係放得低就有出路,至少我喺個仔面前做好身教,佢睇到阿媽係幾咁堅毅。」張慧儀說。

經過愈多風浪,張慧儀變得愈硬淨!

養子幫手揀男人

感情經歷幾番波折的張慧儀,去年被內地富商羅定民力追,但因未能愛屋及烏,將養子視為己出,結果出局。因為做生意,令張慧儀多了一份強悍,亦令異性卻步。「遇到合適嘅,我都要學習吓點樣調節相處。但確實過往傷害令我多咗警惕。年齡大咗,唔會降低擇偶要求,反而係更加清晰。後生追求浪漫、激情,成個人蒙蔽晒睇唔清,依家我個仔幫我過濾,最快捷。」

去年張慧儀被內地富商羅定民力追,但最後無法開花,繼續單身。

患有心臟病的養子 Hanson今年十二歲,還懂得幫媽咪篩選異性。

硬淨單親媽

為給自己的孩子最大保護,幾溫柔的女人都可以變硬淨;尤其係單親媽,冇人幫冇人靠,為咗下一代生活,幾辛苦都頂得住,好神奇!

趙頌茹

慘遭家暴及丈夫周永恒搞婚外情,過去專心湊女的 Yu去年決定作出解脫,離婚重投幕前搵錢,為求有穩定收入, Yu正修讀化妝課程轉型做化妝導師,力保兩個女生活無憂,此外,她亦以過來人身份,為「風雨蘭」擔任婦女大使,支援其他被暴力對待的受害女性。

江希文

跟大律師胡漢清未婚產女的江希文,去年回港生活並爆出不少奇聞,包括離奇受傷,有指她長期精神受虐,幾近崩潰而不得不選擇回復單身。為爭取女兒的生活費,江希文不惜與前度對簿公堂;由於生活費冇着落,江希文企硬不搬離男方的沙宣道大宅。

孫佳君

09年與富商男友劉貴喬因家暴分開後,孫佳君帶同兩子搬返新加坡娘家,近年舉家返港並復出影圈拍戲,孫佳君更與法籍三星米芝蓮大廚 Olivier撻着,再覓第二春。

鍾意就快D Share啦!