53歲「型佬」方中信近年主力北上發展，誘惑何其多，但方中信早前受訪時就話，莫可欣從來唔擔心！因為佢同《律政強人》嘅張強一樣，好鍾意搵錢，「一屋女人」老婆、8歲囡囡、阿媽同家姐，所以絕對唔會為一時興奮，而對美女動心。呢位絕頂好男人被讀者黃先生透過《蘋果》爆相爆片影到佢陪老婆莫可欣及囡囡迦晴一齊去迪士尼樂園玩，同場仲有洪天明及周家蔚一家四口。方中信戴住黑色cap帽，襯黑色拉鏈褸，雖然打扮低調，但身型高大，唔少途人都認得佢。黃先生話方中sir都幾cool，全程好少笑，佢話﹕「見到佢哋係有個紅牌掛喺身，應該係包咗去Iron Man個場(鐵甲奇俠飛行之旅)試玩。見到洪天明抱住個小朋友同白兵影相，之後想叫埋方中信一齊影，方中信行緊過去時，有人截停想同佢影相，但方中信耍手婉拒咗，之後就索性唔同白兵影，行返去Iron Man嗰邊方向。」黃先生話見到方中信一直陪住囡囡，反而見唔到莫可欣，而迦晴全程都好乖，即使人太多行唔郁，都係蹻住手企喺爸爸隔籬。噚日方中信接受《蘋果》訪問，佢話：「我係同個女一齊去玩，感覺都可以喇，不過Iron man好似肥咗啲！」方中信仲透露聖誕會去北海道旅行，一家人過白色聖誕。
來源 source: http://s.nextmedia.com
|
鍾意就快D Share啦！
|
|
|
