掃呢頁CODE去手機

2017年3月23日 星期四

對住坤哥都未夠 麥明詩戲屎狂 NG 黑面田蕊妮忍唔住出手 [壹週刊 - 1411] __,坤哥,麥明詩,田蕊妮,吳業坤,M1,

田蕊妮主動出手幫坤哥整理頭髮,「偽毒」坤哥暗爽!探熱針對住坤哥都未夠 麥明詩戲屎狂NG 黑面田蕊妮忍唔住出手視后田蕊妮演技有幾勁,大家淨係睇早排播完的 ...


田蕊妮主動出手幫坤哥整理頭髮,「偽毒」坤哥暗爽!

探熱針

對住坤哥都未夠 麥明詩戲屎狂 NG 黑面田蕊妮忍唔住出手

視后田蕊妮演技有幾勁,大家淨係睇早排播完的《迷》,見佢對住坤哥(吳業坤)發晒狂逼對方走上天台跳樓一幕,已經睇得出什麼叫演技派。

由於戲好大台就繼續安排田蕊妮拍住班新人,指點他們做戲,在新劇《誇世代》,田蕊妮繼續要對住坤哥,加埋有「坤哥 2.0」麥明詩做對手戲,今次同麥明詩一樣係拍天台跳樓戲,睇吓田蕊妮點樣再發揮其「神級」演技!

坤哥 2.0

在劇集《迷》,田蕊妮(阿田)飾演的「 Cal姐」演技贏盡口碑,逼死坤哥跳樓一幕,網民都睇到拍爛手掌,要對住演技麻麻的坤哥(吳業坤)做對手戲,但竟然冇被對方拖累,依然發揮到神級演技,所以獲網民力捧她為今年視后大熱。

田蕊妮逼死坤哥一幕,觀眾嗌晒心寒,不過有網民就笑言:「不斷俾田蕊妮帶入戲再俾坤哥帶番出嚟!」

「 Cal姐」田蕊妮在剛播畢的《迷》中逼死做佢徒弟的「林家榮」坤哥,其七情上面的演繹令人心寒。

最近阿田再為大台五十周年台慶劇《誇世代》開工,今次除咗同歐陽震華( Bobby)、陳豪視帝級人馬大鬥戲外,大台食過翻尋味,繼續安排阿田與一眾後輩做對手,包括舊拍檔坤哥、陳嘉寶( Anjaylia),以及十優港姐麥明詩。

這部劇阿田同麥明詩有唔少對手戲,上週二(三月十四日),阿田就同陳嘉寶( Anjaylia)、麥明詩等現身西環一大廈天台拍外景,同樣都係跳樓場口,今次主角就換來新丁麥明詩,現場所見,麥明詩一身睡衣 look,赤腳危企天台都毫無怯場,吊住威吔在石壆上行來行去, roll機前還興奮到拎住手機狂自拍,不過拍劇仲係半桶水嘅麥明詩, NG十幾次是常識吧!

簡單一場在天台企圖跳樓戲,對麥明詩來講似乎甚有難度, NG了十幾次導演都唔收貨。

戲屎麥明詩狂 NG,等埋位的田蕊妮黑晒面發呆。

等埋位時,田蕊妮煙駁煙狂 chur打發時間。

坤哥在新劇《誇世代》中同田蕊妮奉旨談情,上週四,二人在西貢拍談情戲。

起初坤哥硬晒軚唔敢掂落阿田度。

阿田出盡辦法帶坤哥入戲,最後兩 take收貨。

戲中坤哥同 Bobby靈魂對調,睇真啲又的確幾似樣喎!

阿田毫不避忌喺坤哥面前整理胸口,嚇到坤哥九秒九擰歪面。

黑面煙駁煙

NG十幾次都未拍得好,阿田個樣開始顯得有點不耐煩,孖住監製陳維冠企埋一邊雞啄唔斷傾偈兼手指指研究,其間仲煙駁煙係咁 chur,在旁的陳嘉寶慘食二手煙。

拍了差唔多兩個鐘導演都唔收貨,阿田忍唔住要出手指導,經阿田教完之後就順利完成!之後到阿田及其他演員拍攝面對墮樓的麥明詩反應,她再發揮其七情上面表情功力,成功帶領住陳嘉寶、安德尊等演員入戲。

樂於提攜後輩的田蕊妮,早前約埋賴慧玲同坤哥到家中齊齊睇《迷》大結局,更出動老公杜汶澤炮製撚手小菜。

坤哥參加《超級巨聲》時,阿田就做司儀,從此二人結下不解之緣。

當仔咁湊

另外,阿田同坤哥真係好有緣,坤哥好似寃魂般纏住唔放,今次他們都有不少對手戲,阿田繼續當他仔咁湊,上週四(三月十六日)二人現身西貢開工拍外景,同場仲有歐陽震華( Bobby),當日阿田同坤哥更有情深擁抱場口,試位時,坤哥硬晒軚唔敢掂落阿田度,完全交唔到戲,她惟有即刻出動「溫柔之手」幫坤哥整理頭髮,又毫不避忌喺坤哥面前整理胸口,終於打破隔膜,到正式埋位坤哥肉緊攬實阿田,結果導演兩 take就

收貨!

對完一班戲屎新人,田蕊妮同番好戲之人張繼聰有對手戲,見到阿田個樣同對住坤哥、麥明詩個樣好唔同,雖然日接夜咁開工但依然笑容滿面,導演一嗌 roll機,阿田即時入戲,呢啲咪叫專業囉!

無綫安排田蕊妮在新劇繼續帶住一班後輩演出,面對「神級」演技嘅田蕊妮,張繼聰都凸晒眼嚟唔切反應。

田蕊妮認真同對手張繼聰對戲。

導演嗌 cut機,田蕊妮一秒變番「大笑姑婆」。

經常演情緒複雜角色,為免有情緒問題,阿田自爆曾向老公備案:「你覺得我有問題就帶我睇醫生。」

撰文、攝影、攝錄:娛樂組


鍾意就快D Share啦!