掃呢頁CODE去手機

2017年10月18日 星期三

【恭喜晒!】曹永廉踢爆 35歲黃翠如已嫁40歲蕭正楠 __,翠如,蕭正楠,正楠,曹永廉,黃翠如,

黃翠如同蕭正楠屢傳婚訊,早前仲有報道話兩人明年結婚,咁兩位主角當然否認啦,但黃翠如就話會考慮喺魚檔影結婚相,因為爸爸最初喺街邊擺檔賣魚,搞到大家行親街 ...


黃翠如同蕭正楠屢傳婚訊,早前仲有報道話兩人明年結婚,咁兩位主角當然否認啦,但黃翠如就話會考慮喺魚檔影結婚相,因為爸爸最初喺街邊擺檔賣魚,搞到大家行親街市都望下有冇人影結婚相。

成個婆仔格嘅翠如,下周一就36歲生日喇,都係時候結婚生B啦。之前蕭正楠被追問秘婚傳聞時大耍太極話:「其實我仲等緊黃翠如向我求婚……我哋兩個相處一般唔會傾結婚,結婚嘅嘢到時候自然會發生,唔使刻意安排。」女方就話驚女仔經常講結婚會怕小器,嗱,越係咁講,越令人懷疑……就咁嘅,本月16號,蕭正楠喺曹永廉微博留言:「10月16日又到了!全港熱烈祝賀老廉更年期依然老當益壯、但願重振雄風!去美國登台只有精叻永冇jet lag,唱歌唔走音,唔會俾人扔爛蕃茄!#全港熱烈祝賀# ​​​​」原來係祝曹永廉生日快樂嘅。

但重點往往喺留言度。曹永廉回佢話:「你隻蕉真係成熟咗,講嘢冇咁口臭,積到啲口德,結咗婚係唔同啲。」

哦!!!!

網民梗係起哄啦,七嘴八舌話:「廉伯爆料!」、「翠如BB同蕭公子結婚了?」、「真的結婚了?阿廉應該不會爆假料吧?」

蕭正楠今日接受傳媒訪問,講到曹永廉話爆佢結咗婚,蕭正楠話:「呢個係佢嘅生日願望,(咁你會唔會實現佢嘅願望?)講咗出嚟就唔靈!」

曹永廉接受傳媒訪問時:「冇呀,我喺微博玩佢之嘛,點知迴響咁大,嘿嘿嘿,微博啲人個個都以為係真嘅……好多人問我係咪真,我話唔係呀,反而咁樣我仲煩咗㖭。」

廉記再三叮囑:「唔好當係真,我希望啫!我都希望講多啲,咁佢哋就結婚㗎喇。」

講番廉記牛一,佢話生日願望最緊要係繼續咁多嘢做,同埋身體健康,因為年紀大咗,健康好緊要。而今年最特別嘅係生日慶祝都係同大家一齊嘅,15號佢喺香港唱歌,成班人同佢慶祝;正日,即係16號,佢就飛去美國登台,因為時差,於是又賺多咗一個生日。而「賺」番嚟個生日,仲可以同Kenny G一齊,輪住上台做嘢,廉記仲勁讚對方好好,因為佢係接住Kenny G出場,明明對方已經落咗台,但Kenny G見到廉記行上台,特登走番轉頭同佢擊掌。

再講到被蕭正楠話佢更年期佢介唔介意,廉記向傳媒表示:「唔介意,阿蕭講嘢係咁衰㗎啦,你認真咪輸俾佢囉!」廉記仲話自己同蕭正楠成日互相窒來窒去,跟住就冇事。廉記仲話自己生日願望係蕭正楠攞到獎,係任何一個獎,希望佢工作今年好過上年,連自己嘅生日願望都顧住蕭正楠先,唔怕班女人——包括廉記太太姜依蘭、囡囡、同埋「蕭太」翠如嬲豬咩?

翠如BB曾經講過,如果真係結婚,希望喺魚檔影婚紗相。 (設計圖片) 婚照曝光…唔係,係《幕後玩家》劇照。

廉記勁讚Kenny G好人 集郵是指定動作 生日蛋糕

鍾意就快D Share啦!