掃呢頁CODE去手機

2017年10月19日 星期四

老公下旨要生四個 禁同 TVB續約 鍾嘉欣開 Turbo追仔 [壹週刊 - 1441] __,嘉欣,TVB,鍾嘉欣,M1,

娛頭老公下旨要生四個 禁同TVB續約 鍾嘉欣開Turbo追仔鍾嘉欣與脊醫老公Jeremy16年結婚,去年八月就火速誕下愛女Kelly,自從做人母後,嘉 ...






娛頭

老公下旨要生四個 禁同 TVB續約 鍾嘉欣開 Turbo追仔

鍾嘉欣與脊醫老公 Jeremy 16年結婚,去年八月就火速誕下愛女 Kelly,自從做人母後,嘉欣大部分時間都留在溫哥華專心湊女。

本月初嘉欣回港出席活動賺奶粉錢,她更帶埋老公同囡囡,一家三口首度一齊回港,十四個月大的 Kelly愈大愈似媽咪。

據知,明年初就同大台約滿的嘉欣,已經被恨生仔的老公禁止再續約及拍劇,而且講到明要生四個,所以嘉欣夠鐘要開行 turbo追生仔。

一家三口出動

本月初,鍾嘉欣趁中秋佳節假期,首度帶埋老公同囡囡一家三口飛返香港,這趟家庭旅行,鍾嘉欣除了享受家庭樂,當然都不忘約埋成班過氣「處女黨」成員王君馨、李亞男、苟芸慧和岑麗香食飯敍舊,其間又要留低老公同囡囡在香港,獨自飛往馬來西亞出席代言活動,搵奶粉錢。

完成馬來西亞工作,鍾嘉欣急急返港會合番老公同囡囡,上週二(十日),鍾嘉欣一家三口在又一城 shopping,老公人生路不熟,自認在港做「 Big Boss」的嘉欣帶領兩父女行街左逛右逛,雖然近兩年甚少時間在香港,但她依然熟路,去到出名平價的 Uniqlo掃禦寒衣服,婚前已經慳的嘉欣,婚後依然係慳家師奶,而且處處幫老公同囡囡諗先,他們極速掃走兩袋戰利品,愛妻號嘅 Jeremy不但全程孭住囡囡,而且仲爭住幫老婆拎重嘢,但一向獨立嘅嘉欣當然不會讓老公仔辛苦,兩公婆互相爭攞嘢,場面十分搞笑。

眨吓眼他們一家轉戰 Zara home睇家庭用品,雖然嘉欣係大台一線花旦,但當見到屋企嘢,就同一般師奶冇分別,雙眼發光,不需幾分鐘已經把所有日常用品攞晒上手,當她一見到 BB嘅衫仔同毛巾更母性大發,拉埋老公一齊研究,好奇在嘉欣都偏向選藍色的 BB用品,其中一件衫仲打孖上買兩件,莫非恨生仔的嘉欣,為未來第二個 B仔做好準備?





買定 B仔衫

嘉欣買了大量粉藍色 BB衫同毛巾,咁快就為未來囝囝做好準備。





鍾嘉欣的脊醫老公 Jeremy捉住阿女雙手跳舞氹媽咪。





眼瞓放蚊

有親友前來會合,可惜 Kelly攰到放蚊。





全程老公孭

阿女瞌晒眼瞓,鍾嘉欣俾完錢急急腳拉住老公走人。





嘉欣同老公去了出名走平民化價錢的 Uniqlo掃了兩大袋禦寒衣服。





結婚當日嘉欣表示老公話要生四個,她就答應會配合。

十指緊扣返加國

兩公婆湊住寶貝女返港玩足兩星期,上週六晚(十四日),一家三口現身機場準備飛返加拿大,當晚嘉欣同老公全程戴住黑超,而 Jeremy繼續做廿四孝爹哋負責孭住愛女,一歲有多的 Kelly,頭髮濃密紮住條辮仔好得意,加上個性似足嘉欣一樣溫馴乖巧,一度引來地勤職員注目要逗她玩,兩公婆看到女兒這麼討人喜歡,面上亦紛紛流露出滿足的表情。辦完登機手續後, Jeremy照顧女兒之餘亦冇冷落到身旁嘅嘉欣,主動伸手拖實老婆,二人恩愛十足,當記者上前拍攝,嘉欣同老公都大方任影全程冇黑面。





在港玩足兩個禮拜,上週六(十四日),鍾嘉欣一家三口現身機場準備返加國,兩公婆拖到實,好恩愛。





Check in期間,囡囡全程眼仔碌碌無扭計,媽咪冧晒。





辦理完登機手續, Jeremy捉住阿女手仔講「 Goodbye」,好有家教。





Kelly如今一歲有多,眼大大,鼻高、嘴細,加上一頭濃密頭髮,好得意。





嘉欣下年約滿無綫,唱片公司老闆 Herman同樂小姐都有親自同佢傾續約。

開工掛住個女

自從結婚生女後,嘉欣好享受做全職太太及母親這個角色,完全唔肯離開個女半步,就算飛回香港工作幾日,都要帶埋 Kelly跟身先放心,早前大台為了搵嘉欣復出拍劇,竟然願意遷就她,特別拉隊去溫哥華拍攝,由於大台誠意搭夠,但係嘉欣最終只肯在《新創世紀》客串幾日。

「拍戲嗰幾日雖然每日只係拍十個鐘左右,但係嘉欣都已經成日心掛掛,好想快啲拍完返屋企,不過嘉欣依然有戲癮,仲係鍾意做戲,同埋佢一直都想攞視后,呢個係佢心願之一。」鍾嘉欣身邊人說。





難得返香港,鍾嘉欣當然約埋成班「處女黨」姊妹飯聚。





Kelly(右)同嘉欣細個時候樣貌,完全倒模一樣。





鍾嘉欣間中都有 po愛女相同粉絲開心 share。





嘉欣為賺奶粉錢,返港旅行期間都攝期去馬來西亞出席活動。

明年約滿





自從結婚生女後,鍾嘉欣一家三口定居溫哥華,一有時間就返港出騷賺奶粉錢。

其實下年初,嘉欣同 TVB的合約就完結,早在半年前樂易玲已經成日搵嘉欣傾續約,但她一直以忙住湊女敷衍應對,今次返港都有高層想約嘉欣傾約,不過她依然唔願意傾。「 Jeremy好唔想嘉欣繼續做呢行,想佢留喺溫哥華做全職太太同照顧小朋友,佢哋都為續約呢個問題傾過好幾次, Jeremy就企硬唔俾老婆再拍戲,再同 TVB續約更加無得傾,好似依家間中返嚟香港幾日出席活動就仲可以接受。」鍾嘉欣身邊人說。

配合老公生四個

除了想嘉欣留在溫哥華照顧 Kelly之外, Jeremy另一個目的就是想嘉欣幫他生多三個小朋友,而且 Jeremy好恨生仔,所以要嘉欣盡快開工再生。

「結婚初期 Jeremy已經同嘉欣講想生夠四個,而嘉欣都話會盡量配合,因為佢哋兩個都好鍾意小朋友,生完 Kelly之後,佢哋呢個想法都無變。」鍾嘉欣身邊人說。

之前嘉欣曾經講過等 Kelly歲半之後,先會再生第二個,現在 Kelly已經十四個月大,即係仲有四個月,嘉欣就可以同老公開 turbo造人。





鍾嘉欣在《溏心風暴》的首兩輯做「常在心」及「于素心」深入民心,在第三輯雖然未能參演,但她會唱插曲支持。





新劇《再創世紀》在溫哥華拍外景,鍾嘉欣在能夠家庭事業兩邊兼顧的情況下答應客串。

慳自己豪仔女

平時鍾嘉欣慳食慳著慳用,過住節儉生活,如今萬事以仔女行先,圈中有不少藝人都不惜工本供仔女入名校買豪宅,將最好的生活給下一代。

楊思琦

一直有慳妹之稱的楊思琦,獨自養女,多年來起居飲食都慳到盡,食快餐店掃特價貨,但為咗幫囡囡鋪路,思琦女有本地學校唔讀,轉讀每月近萬元學費的貴族學府英基國際學校。

蔡少芬

多年來,蔡少芬密密做無停手,自己死慳死抵,衣食行都樸素,走平民風格不好名牌,自兩女出世後,為女兒將來入學着想,蔡少芬連環掃樓,包括凱旋門及灣仔囍匯,包抄九龍港島區名校校網,去年更以二千六百萬買入元朗爾巒豪宅,為下一代有優質生活條件。

吳綺莉

自 11年與女兒吳卓林回港生活後,吳綺莉處處慳住使,遠離星級生活,揸慳油車,住大埔村屋,但豪供卓林入讀學費逾十萬的國際學校,去年又豪擲一千五百萬買入大坑 1,300呎單位,等卓林有更好居住環境。

生 B唔續約

不少無綫花旦,嫁人後開始減產,等到與無綫約滿便即時離巢,養尊處優,等待生 B機會。

楊怡

為無綫效力十七年,楊怡去年與拍拖五年的羅仲謙拉埋天窗,並約滿離巢無綫,即使出動無綫兩大高層樂易玲及杜之克,楊怡一樣無動於衷,疊埋心水養好身體等生 B,早前只是以外援身份,接拍《再創世紀》。

胡杏兒

15年,搭上現任老公 Phil,並火速宣布結婚,同年約滿無綫,胡杏兒即結束與無綫 16年賓主關係,一直等機會生 B,上星期宣布誕下兒子 Brendan。

陳茵微

13年,陳茵媺與陳豪拉埋天窗,一直等到 15年, Aimee與無綫約滿即時離巢,減少幕前演出,先後誕下兩子一女,實行三年抱三。

撰文:娛樂組

攝影、攝錄:蕭敬漁、李溢敏、余一駱、潮鍾


鍾意就快D Share啦!